Klám á heimasíðu Nylon

Spjallsvæði virðist vera óvarin fyrir ágangi klámsíðna og nú hefur stúlknasveitin Nylon orðið fyrir barðinu á óforskömmuðum netverjum.

Tengla á klámsíður var að finna á spjallsvæði stúlknasveitarinnar Nylon sem starfrækt er á heimasíðu sveitarinnar og fór fréttin eins og eldur um sinu á netheimum í gær. Á tenglasíðunni b2.is mátti sjá vísun yfir á svæðið og þar máttt glögglega sjá ósiðsamlega fullorðinstengla sem ekki eiga heima hjá jafn barngóðri sveit og Nylon.

Einari Bárðarsyni, umboðsmanni sveitarinnar, var augljóslega brugðið þegar Fréttablaðið bar þetta undir hann. Hann sagði að aðilar sem störfuðu fyrir Nylon í Bretlandi fylgdust vel með þessu og væru duglegir við að henda út þessum óþverra. „Því miður er þetta ekki eina vefsíðan sem verður fyrir barðinu á óprúttnum aðilum sem planta svona viðbjóði á spjallsvæðum," útskýrir Einar en hann hafði ekki séð þessa tengla sjálfur. „Ég er mjög óhress með þetta enda taldi ég mig vera með menn í vinnu sem ættu að koma í veg fyrir að svona hlutir gætu gerst," bætir Einar við og sagðist ætla að ganga í málið af fullum krafti.

Einar taldi þetta vissulega bagalegt ástand í ljósi þess að gestir heimasíðunnar væru oft saklaus börn og ungmenni sem vildu fylgjast með gangi mála hjá sveitinni. Hann sagði að farið yrði strax í að reyna finna leiðir og lausnir sem kæmu í veg fyrir að svona hlutir gerðust aftur.