Misskilningur að Geir hafi slitið fundinum

Marta Guðjónsdóttir formaður Varðar segir það vera misskilning að Geir H. Haarde forsætisráðherra hafi slitið fundi félagsins í gærkvöldi eftir ávarp sitt. "Hann impraði aðeins á því í lokin hvort ekki ætti að segja þetta gott," segir Marta. "En ég stökk til að dyrunum og sagði að fundurinn héldi áfram."

Marta segir að síðan hafi Vilhjálmur Vilhjálmsson stigið í pontu og ávarpað fundinn eins og til stóð og menn rætt málin. "Það er óhætt að segja að mikill einhugur hafi verið á þessum fundi," segir Marta. "Það var klappað mikið og lengi fyrir þeim báðum, Geir og Vilhjálmi."

Fundurinn í gærkvöld var sá þriðji á skömmum tíma sem Vörður hefur haldið eftir að meirihlutinn féll í borginni. "Það er hlutverk Varðar að halda fundi sem þessa, bæði til að ræða það sem gerst hefur sem og að koma upp sem öflugastri stjórnarandstöðu," segir Marta.