Fyrrverandi meindýraeyðir dæmdur fyrir vopnalagabrot

Héraðsdómur Norðurlands eystra hefur dæmt karlmann í tveggja mánaða skilorðsbundið fangelsi fyrir vopnalagabrot með því að hafa í fórum sínum fjölmargar byssur án þess að geyma þær í læstum hirslum eins og lög gera ráð fyrir.

Maðurinn var áður meindýraeyðir á Norðurlandi en félag hans fór í þrot á fyrri hluta árs 2005. Eftir að lögregla fékk ábendingu fór hún í byrjun september sama ár í húsnæði þar sem fyrirtæki mannsins hafði verið og hann hafði sjálfur búið. Fann hún þar á átján byssur af ýmsu tagi á víð og dreif en ekki í byssuskáp eins og lög gera ráð fyrir.

Um tveimur mánuðum síðar tilkynnti maðurinn að að þrettán byssum og veiðiboga hefði verið stolið á heimili hans. Aðstoðaði maðurinn lögregluna við að hafa upp á langflestum vopnunum en hann var engu að síður ákærður fyrir að hafa ekki gengið nógu tryggilega frá þeim.

Samkvæmt lögum ber einstaklingi sem á fleiri en þrjú skotvopn að geyma þau í sérútbúnum vopnaskáp sem samþykktur er af lögreglustjóra. Dómurinn segir að ekki þurfi að fara í grafgötur með það að freklega hafi verið brotið gegn þessu og að maðurinn hafi borið ábyrgð á því.

Segir dómurinn geymsluháttinn óforsvaranlegan og enn ámælisverðari en ella með tilliti til þess að maðurinn hafi átta að teljast fagmaður í meðferð skotvopna. Auk þess að dæma manninn í skilorðsbundið fangelsi voru vopnin öll gerð upptæk.