Innlent

Sættir í Sjálfstæðisflokknum?

REI-málið og upplausn meirihlutans í Reykjavík hefur verið afar erfitt mál fyrir flokkinn segir Vilhjálmur Þ. Vilhjálmsson, fyrrverandi borgarstjóri. Hann segir sátt hafa náðst á fundi Varðar, fulltrúaráðs Sjálfstæðisflokksins í gær. Bréf sem sent var Agli Helgasyni, fjölmiðlamanni bendir þó til annars.

Fulltrúaráðið fundaði í Valhöll í gærkvöldi þar sem fara átti yfir málefni borgarinnar undanfarna daga. Formaður flokksins, Geir H. Haarde, mætti á fundinn og mæltist til um að flokksmenn stæðu þétt saman og lýsti yfir stuðningi við borgarstórnarflokkinn.

Vilhjálmur Vilhjálmsson, fyrrverandi borgarstjóri, sagði eftir fundinn að flokkurinn þyrfti að vinna að því nú að vinna traust borgarbúa.

Geir H. Haarde, formaður Sjálfstæðisflokksins, sagði í fréttum Stöðvar 2 í gær að borgarstjórnarflokkurinn nyti fulls trausts innan flokksins. Í sama streng tók formaður fulltrúaráðsins en bréf sem sent var Agli Helgasyni fjölmiðlamanni og hann birti á bloggsíðu sinni bendir til annars.

Þar er því lýst að Geir hafi stormað inn á fundinn, haldið þar ræðu þar sem hann fór fram á að menn sættust og bað síðan um að fundinum yrði slitið. „Annan eins dónaskap og lítilsvirðingu hef ég ekki upplifað af formanni áður," segir bréfritari. Þá greinir DV frá því í dag að innanbúðarmenn telji að Vilhjálmur hætti í pólitík fljótlega og þykja ummæli Geirs frá því í fréttum Stöðvar tvö í gær gefa þeim sögum byr undir báða vængi.

Mest lesið


Fleiri fréttir

Sjá meira


×

Mest lesið