Norðmenn leggjast gegn olíuvinnslu Íslendinga við Jan Mayen

Norska umhverfisstofnunin og náttúruverndarsamtök þar í landi vilja koma í veg fyrir að Íslendingar hefji olíuvinnslu á Drekasvæðinu svokallaða fyrir sunnan Jan Mayen.

Í yfirlýsingu frá norsku umhverfisstofnuninni er lýst yfir miklum áhyggjum vegna fyrirætlana Íslendinga.

Þá er haft eftir Lars Haltbrekken, talsmanni norsku náttúruverndarsamtakanna, í norska ríkissjónvarpinu að hefji Íslendingar olíuvinnslu á svæðinu sé lífríkinu þar stefnt í hættu. Segist hann ætla taka málið upp á fundi með Náttúruverndarsamtökum Íslands.

Í skýrslu sem iðnaðarráðuneytið kynnti í aprílmánuði síðastliðnum er lagt til að gefið verði út sérleyfi til leitar, rannsókna og vinnslu á olíu og gasi á norðanverðu Drekasvæðinu fyrir sunnan Jan Mayen. Þá kom einnig fram í skýrslunni að niðurstöður jarðeðlisfræðilegra rannsókna bendi til þess að þar megi finna olíu og gas í vinnanlegu magni.

Í síðastliðnum ágústmánuði lýsti Össur Skarphéðinsson, iðnaðarráðherra, því yfir að hann vilji gefa út sérleyfi til olíuleitar við Ísland innan árs. Sagði hann ennfremur að öll gögn um málið væru jákvæð og að áhugasamir aðilar hefðu þegar sett sig í samband við ráðuneytið.