Fokkerinn kominn til Reykjavíkur

Fokker-vélinni, sem nauðlenti á Egilsstaðaflugvelli í gærkvöldi, var flogið aftur til Reykjavíkur nú síðdegis að viðgerð lokinni.

Flugstjórinn ákvað skömmu eftir flugtak frá Egilsstöðum í gærkvöldi að drepa á öðrum hreyflinum og snúa við eftir að olíuleka varð vart en við það féll jafnþrýstingur af farþegarými. Fjörutíu og einn maður var um borð og sakaði engan þar sem lendingin tókst vel. Farþegarnir héldu för sinni áfram til Reykjavíkur með vél, sem send var eftir þeim laust fyrir miðnætti. Flugvirkjar, sem héldu austur í morgun fundu brátt orsök lekans, sem reyndist óþétt pakkning. Bráðabirgðaviðgerð lauk síðdegis og var vélinni þá flogið til baka til Reykjavíkur en án farþega.