Samgönguráðherra: Leigubílstjórar þora ekki að vera í miðbæ Reykjavíkur

Leigubílstjórar þora ekki að vera í miðbæ Reykjavíkur um helgar og á nóttunni vegna ástandsins þar að sögn Kristjáns L. Möller, samgönguráðherra. Þetta kom fram í svari ráðherra í fyrirspurnartíma á Alþingi í dag.

Ármann Kr. Ólafsson, þingmaður Sjálfstæðisflokksins, spurði ráðherra hvort hann áformi að breyta lögum um leigubifreiðar til þess að mæta mikilli eftirspurn eftir leigubílum á mestu hánnatímum. Fram kom í máli Ármanns að nú þegar sé mikill skortur á leigubílum í miðbæ Reykjavíkur um helgar og í tengslum við aðra frídaga. Sagði hann viðbúið að ástandið muni versna fari svo að skemmtistöðum verði meinað að hafa opið lengur en til klukkan þrjú um helgar.

Í svari Kristjáns L. Möller, samgönguráðherra, kom fram að nú stendur yfir endurskoðun á regluverki sem gildir um leigubílaakstur. Meðal annars verður kannað hvort hægt verður að fjölga leyfum um helgar. Ráðherra benti hins vegar á að ef leigubílum fjölgar mikið muni rekstrarskilyrði fyrir þá sem eru í greininni versna og það geti leitt til hærri notendagjalda. Þá sagðist ráðherra vita til þess að margir þeirra sem stunda leigubílaakstur þori ekki að vera í miðbæ Reykjavíkur um helgar og á nóttunni vegna ástandsins sem þar ríkir.