Leggst gegn Bitrunvirkjun

Skipulags- og byggingarnefnd Hveragerðisbæjar leggst alfarið gegn fyrirhugaðri Bitruvirkjun á Hengilssvæðinu þar sem hún er talin hafa veruleg skaðleg áhrif á möguleika Hveragerðis og nágrennis sem íbúða- og ferðamannasvæðis. Þetta var samþykkt á fundi nefndarinnar í gær.

Eins og fram hefur komið í fréttum eru framkvæmdirnar umdeildar því rúmlega 400 athugasemdir bárust Skipulagsstofnun vegna þeirra. Mun það vera Íslandsmet í athugasemdum vegna virkjunar.

Engu að síður bendir nefndin á að framkvæmdasvæðið sé gríðarstórt og á Náttúruminjaskrá. Landslagið sé stórbrotið og fjölbreytt að jarðfræðilegri gerð. Rík ástæða sé því til að hlífa svæðinu fyrir stórfelldum framkvæmdum.

Enn fremur telur nefndin að Hengilssvæðið sé eitt mikilvægasta útivistarsvæðið á Íslandi, einkum vegna fjölbreytileika þess, auðvelds aðgengis að því og nálægð við þéttbýlasta svæði landsins. Bent er á að í frummatsskýrslu komi fram að ,,að áhrif Bitruvirkjunar á núverandi ferðaþjónustu og útivist verði talsverð."

Þá bendir nefndin á að hluti neysluvatns Hvergerðinga komi frá virkjunarsvæðinu og að mati nefndarinnar er ekki gerð fullnægjandi grein fyrir áhrifum vatnstöku fyrir virkjunina á vatnból Hvergerðinga. Þá telur nefndin að ekki hafi verið tekið nægt tillit til mengunarhættu sem fylgir virkjunarframkvæmdunum og rekstri virkjunarinnar, s.s vegna umferðar og fráveitu.

Þá séu á svæðinu vinsælar göngu- og reiðleiðir sem þar hafi verið um aldir og að þær muni spillast með framkvæmdunum. Bendir skipulags- og bygginganefnd enn fremur á að framkvæmdasvæðið sé svo til í túnfæti bæjarins og fjölmargir ferðaþjónustuaðilar í Hveragerði og nágrenni eigi beinna hagsmuna að gæta í þessu máli.

Telur nefndin að framkvæmdin þurfi mun meiri undirbúning, rannsóknir og kynningu og telur að marka þurfi heildar stefnu um jarðhitanýtingu á Hellisheiðar- og Hengilssvæðinu áður en lengra verður haldið í virkjanaframkvæmdum. „Þannig verður nauðsynleg sátt um málið best tryggð," segir nefndin.