Til valda án málefnaskrár

Málefnaskrá nýs meirihluta í Reykjavík mun ekki liggja fyrir fyrr en í næsta mánuði, engu að síður tekur nýr meirihluti við á þriðjudag. Oddviti Vinstri grænna segir að umhverfis- og samgöngumál muni bera þess merki að vera í forsjá þess flokks.

Fulltrúar hins nýja meirihluta í Reykjavík leggja nú sem óðast línurnar eftir óvænta breytingu á valdahlutföllunum í borginni. Aðrar áherslur í stórum málaflokkum hljóta óhjákvæmilega að fylgja. Það er hins vegar ljóst að hverjar þær breytingar verða liggur ekki fyrir strax, því ekki má búast við að málefnaskrá nýs meirihluta liggi ekki fyrir fyrr en í næsta mánuði. Meðal mála sem búast má við að áherslubreytingar verði á eru orkumál, til dæmis hvað varðar sölu á raforku til stóriðju.

Bæði Dagur B. Eggertsson verðandi borgarstjóri og Svandís Svavarsdóttir oddviti Vinstri grænna segja að farið verði yfir þessi mál, en þau eru á borði Svandísar. Hún segir samstöðu um að nýta beri Vatnsmýrina fyrir íbúðabyggð og fjölbreytta starfsemi og að Reykjavíkurflugvelli verði fundinn góður staður. Sjálfstæðismenn vilja mislæg gatnamót á mótum Kringlumýrar- og Miklubrautar, en R-listinn þáverandi vildi þá lausn sem nú er.

Svandís telur ekki að mislæg gatnamót eigi að vera á mótum Kringluýrarbrautar og Miklubrautar. En þrátt fyrir að málefnaskrá liggi ekki fyrir segir Dagur að nýr meirihluti taki við völdum á þriðjudag klukkan tvö.