Sjálfstæðismenn funda í Valhöll um stjórnarslit í borginni

Borgarstjórnarflokkur Sjálfstæðismanna situr nú á fundi í Valhöll og ræðir stöðu mála. Einnig hyggst hann funda með Verði fulltrúaráði Sjálfstæðisfélaganna í Reykjavík síðar í dag. Það var þungt hljóðið í borgarfulltrúum þegar þeir komu á fundinn.

Borgarstjórnarflokkur Sjálfstæðisflokksins kom saman í Valhöll fyrir stundu til að fara yfir sviptingar gærdagsins. Það var þungt í mönnum hljóðið og enginn vildi gefa upp hvað yrði rætt á fundinum fyrir utan þá stöðu sem upp er komin. Þegar borgarfulltrúar voru spurðir að því hvort þeir hygðust bregðast við þessum atburðum á einhvern hátt var fátt um svör.

Vilhjálmur Þ. Vilhjálmsson borgarstjóri sagði fyrir fundinn að farið yrði yfir stöðuna og aðspurður um hvort brugðist yrði við stjórnarslitunum sagði hann að það gæti vel verið. Þau Júlíus Vífill Ingvarsson, Jórunn Frímannsdóttir og Gísli Marteinn Baldursson sögðu sömuleiðis öll að farið yrði yfir stöðuna með fulltrúaráði flokksins og bætti Gísli því við að sjálfstæðismenn myndu stilla saman sína strengi.