Hydro keppir um orku til álvers á Íslandi

Það vakti athygli í fyrra þegar Hydro opnaði sérstaka skrifstofu á Íslandi, að Smiðshöfða eitt í Reykjavík. Við það tækifæri héldu forystumenn álframleiðslu fyrirtæksins blaðamannafund þar sem þeir lýstu áhuga sínum á fjárfestingum hérlendis. Og enn minna Norðmennirnir á sig. Fimm manna sendinefnd Hydro fundaði í gær bæði með fulltrúum Landsvirkjunar og Orkuveitu Reykjavíkur. Með heimsókn sendinefndarinnar sendir norska fyrirtæki skýr skilaboð um að það ætli að taka þátt í samkeppninni um íslensku orkuna.

Bjarne Reinholdt, starfsmaður Hydro á Íslandi, segir að þótt Hydro-menn vilji gjarnan hefjast handa sem fyrst líti þeir á þetta sem langtímaverkefni og þeir séu þolinmóðir. Spurður um staðsetningu nefnir hann að Hydro hafi verið að skoða Þorlákshöfn og Keilisnes en einnig fleiri staði.