Landsbankinn býður 200 völdum viðskiptavinum á La Scala á Ítalíu

Landsbankinn býður tvö hundruð völdum viðskiptavinum bankans ásamt mökum í ferð til Ítalíu um helgina. Farið verður á La Scala Óperuna, gist verður á fimm stjörnu lúxushóteli og vel gert við sig í mat og drykk.

Flogið verður til Milano á Ítalíu í beinu leiguflugi með viðskiptavini Landsbankans klukkan 8 í fyrramálið.

Ferðamaður þarf að greiða um 50,000 krónur fyrir sætið færi hann með Icelandair til Mílanó og aftur heim.

Gist verður á lúxus hótelinu Principe Di Savoia í miðborg Mílanó. Þetta er fimm stjörnu hótel sem hefur verið griðastaður fyrir ferðamenn og stórstjörnur frá árinu 1920.

Hótelið býður jafnan nóttina á 53 þúsund krónur miðað við gistingu í tveggja manna herbergi. Þó má geta þess að afslættir bjóðast á vefsvæði hótelsins en þar var hægt að kaupa gistingu í lúxus herbergi, aðfararnótt sunnudags, fyrir röskar 34,000 krónur. Tvær nætur kosta því 68,000 krónur miðað við afsláttaverðið.

Annað kvöld verður boðið upp á léttar veitingar á hótelinu áður en haldið er í La Scala Óperuna. Ekki var hægt að fá uppgefið hvað léttar veitingar kosta á hótelinu Principe Di Savoia.

Á La Scala ætla viðskiptavinir Landsbankans að sjá Don Kíkóta. Ekki er ætlast til að fólk mæti á gönguskónum því krafist er spariklæðnaðar.

Á heimasíðu La Scala, kostar miðinn 1,300 krónur fyrir þann stað þar sem lakast er að sitja. Bestu sætin kosta hins vegar hartnær 7,000 krónur. Ef meðalvegurinn er farinn kostar 3,600 krónur að njóta Don Kíkóta.

Að sýningu lokinni verður boðið upp á veitingar á Four Seasons lúxus hótelinu. Ekki fékkst uppgefið á hótelinu hvað veislan kostar.

Á laugardag verður boðið upp á hátíðarkvöldverð í Sforzesco kastalanum. Ekki er ljóst hvað kvöldverðurinn kostar. Viðskiptavinir Landsbankans þurfa að taka fram spariklæðin fyrir kvöldið því konur eiga að mæta á síðkjólum og karlar í reykfötum.

Ekki fékkst uppgefið hjá Landsbankanum í dag hver heildarkostnaðurinn er við þessa boðsferð. Venjulegur maður, þjakaður af yfirdrætti í sínum banka, þarf hins vegar að greiða 120,000 krónur hið minnsta fyrir svona reisu.