Ríkisstofnunum fækkar

Ríkisstofnunum fækkaði um 50 frá árunum 1998 til 2006 samkvæmt samantekt fjármálaráðuneytisins. Fjöldi starfsmanna hjá ríkisstofnunum var 21.600 í lok síðasta árs og um þriðjungur þeirra vann hjá heilbrigðisstofnunum.

Fram kemur í vefriti fjármálaráðuneytisins að árið 1998 hafi ríkisstofnanir verið 250 talsins. Í október á síðasta ári voru þær hins vegar 204 og hefur fækkað um 46 á síðastliðnum níu árum.

Þá segir ennfremur í ritinu að heildarfjöldi starfsmanna hjá ríkisstofnunum hafi verið 21.600 í 17.600 stöðugildum í október á síðast ári. Flestir voru starfandi hjá heilbrigðisstofnunum víðs vegar um land eða 8.210 manns. Hjá framhalds- og háskólum störfuðu 4.480 manns í lok síðasta árs.