Actavis deilir við bandarískt fyrirtæki um einkaleyfi á verkjalyfi

Actavis hefur lagt inn skráningu til bandaríska Matvæla- og lyfjaeftirlitsins fyrir samheitalyf verkjalyfsins Avinza en félagið véfengir einkaleyfi lyfjafyrirtækisins King Pharmaceuticals á lyfinu.

Eftir því sem fram kemur í tilkynningu frá Actavis rennur einkaleyfi King út árið 2017 en forsvarsmenn Actavis vonast til að lyfið verði sett á markað eftir þrjú ár. King greindi frá því í vikunni að félagið myndi lögsækja Actavis vegna málsins og kemur lögsóknin stjórnendum Actavis ekki á óvart því nær algilt er í slíkum tilvikum að einkaleyfishafi höfði mál.

Ekki hefur fengist staðfest að Actavis sé fyrsta félagið til að leggja inn skráninguna en reynist það rétt þá fær félagið sex mánaða einkaleyfi á sölu lyfsins.

Avinza seldist fyrir um 11 milljarða króna á 12 mánaða tímabili sem lauk í júní 2007 samkvæmt upplýsingum bandarískra heilbrigðisyfirvalda og því er ljóst að eftir töluverðum fjármunum er að slægjast fyrir Actavis.