Búist við að 800 tonn af flugeldum verði sprengd upp

Sorphirðan í Reykjavík varar fólk við að henda leifum af flugeldum í ruslatunnur. Kaupendur flugelda eiga að fara sjálfir með umbúðir og aðrar leyfar í endurvinnslustöðvar Sorpu. Búast má við mikilli loftmengun á gamlárskvöld því skottertur og blys valda mestum reyk.

Í tilkynningu frá Reykjavíkurborg segir að búist sé við að 800 tonn af flugeldum verði sprengd upp í kringum áramótin. Spáð er að stórar skottertur njóti vinsælda meðal almennings og því er líklegt að víða standi tómir tertukassar á nýársdag. Íbúar á Höfuðborgarsvæðinu eru því hvattir til þess að skila umbúðum og leyfum af flugeldum og tertum á endurvinnslustöðvar Sorpu sem opna 2. janúar. Starfsmenn endurvinnslustöðva meta þá hvort sorpið getur flokkast með pappa, sé óendurvinnanlegt eða hvort það þurfi að eyða því sökum gruns um að eitthvað sé enn ósprungið.

Starfsmenn Sorphirðu Umhverfissviðs Reykjavíkur keppast við milli jóla og nýárs að tæma hverja einustu tunnu einu sinni. Verkið hófst strax á annan í jólum og lýkur vonandi fyrir gamlársdag

„Um hátíðarnar fellur til mikið rusl og við viljum alls ekki fá terturnar í tunnarnar. Bæði er það óæskilegt vegna hættu á íkveikju og svo fylla þær tunnurnar," segir Sigríður Ólafsdóttir rekstrarstjóri Sorphirðunar. Einnig hvetur hún íbúa borgarinnar að moka frá sorptunnunum svo að hægt verði að ljúka vikulegri yfirferð fyrir ármót.

Sigríður segir að hver hirði eftir sig og gangi frá. „Meginreglan er að íbúar í hverju borgarhverfi hreinsi sjálfir sitt nánasta umhverfi eftir flugeldasýninguna miklu, sæki leyfarnar á nýársdag og fari með þær í Sorpu 2. janúar," segir hún.