Mikið um umferðaróhöpp vegna hálku

Talsvert var um umferðaróhöpp í umdæmi lögreglunnar á Suðurnesjum í dag vegna hálku. Harður árekstur varð á Reykjanesbraut við Stekk í Reykjanesbæ og þá hafnaði einn bíll á ljósastaur á Vallarheiði.

Samkvæmt frétt lögreglunnar á Suðurnesjum lentu tvær bifreiðar í árekstri á gatnamótum á Reykjanesbraut við Stekk í Reykjanesbæ. Fjarlægja þurfti báðar bifreiðarnar af vettvangi með kranabifreið. Þá missti ökumaður stjórn á bifreið sinni á Vallarheiði með þeim afleiðingum að hann hafnaði á ljósastaur. Sá bíll var einnig fjarlægður af vettvangi með kranabifreið.

Annar ökumaður missti stjórn á bifreið sinni á Grindavíkurvegi sökum og hálku og hafnaði bifreiðin utan vegar. Enn einn ökumaður missti stjórn á bíl sínum á Reykjanesbraut og hafnaði einnig utan vegar.

Enginn slasaðist í þessum óhöppum að sögn lögreglunnar en eignatjón talsvert.