Lögðu vegslóða án leyfis

Umhverfisnefnd og bæjarráð Akureyrar átelja vinnubrögð forsvarsmanna skíðasvæðisins í Hlíðarfjalli sem gert hafa vegslóða upp á brún Hlíðarfjalls án þess að hafa fyrir því tilskilin leyfi.

"Þarna hafa menn farið aðeins fram úr sér," segir Hjalti Jón Sveinsson formaður umhverfisnefndar sem er einn þeirra sem gagnrýnt hefur vinnubrögðin. Hann tekur það fram að ekki sé verið að draga í efa að nauðsynlegt sé að leggja umræddan vegslóða en áréttar að umhverfisnefnd og bæjarráð þurfi að fjalla um málið áður en ráðist sé í svona framkvæmdir.

Umhverfisnefnd óskaði eftir upplýsingum um hvernig staðið yrði að framkvæmdum en því erindi var ekki svarað af forsvarsmönnum skíðasvæðisins sem réðust í lagningu slóðans án þess að málið væri afgreitt úr tilheyrandi nefndum og ráðum.

"Menn verða að fara eftir reglum," segir Hjalti sem hefur kallað Guðmund Karl Jónsson, forstöðumann skíðasvæðisins á fund umhverfisnefndar til að útskýra málið.