Fasteignasali kærður fyrir svindl

L94 ehf, sem er í eigu athafnamannsins Andrésar Péturs Rúnarssonar, hefur kært Ernu Valsdóttur, löggiltan fasteignasala, hjá fasteignasölunni Fasteignakaup hf. til eftirlitsnefndar Félags fasteignasala.

Erna seldi eign fyrir fyrirtækið L94 ehf, sem er í eigu Andrésar. Umsamin sölulaun vegna þeirrar eignar voru 1,5% af söluandvirðinu eða um 962 þúsund krónur.

Andrés greiddi að eigin sögn Ernu 621 þúsund krónur en hélt eftir 340 þúsund krónum. Hann segir ástæðuna fyrir því að hann hafi ekki greitt henni alla upphæðina vera þá að salan hafi ekki enn gengið i gegn. „Hún er ekki enn búin að klára dæmið," segir Andrés Pétur í samtali við Vísi.

Síðar seldi Erna eign eign að Trönuhrauni í Hafnarfirði fyrir Andrés Pétur. Fasteignasalan tók á móti kaupsamningsgreiðslum og gerðu upp fasteignagjöld og fjárnám vegna eignarinnar. Erna átt svo að greiða eftirstöðvar til seljanda. Hún greiddi aðeins hluta þeirrar upphæðar en hélt eftir rúmum 340 þúsund krónum á þeirri forsendu að hún ætti enn eftir að fá greitt vegna fyrri sölunnar. „Ég er bara að skuldajafna hérna við hann. Og greiði honum síðan mismuninn," segir Erna í samtali við Vísi. Hún telur ekkert óeðlilegt við viðskiptahætti sína og fagnar því að málið skuli vera komið til eftirlitsnefndarinnar. "Ég hef ekkert að fela," segir Erna.

Andrés segir mjög vafasamt að blanda saman þessum tveimur kaupsamningum eins og Erna geri. Í seinna dæminu sé um vörslufé að ræða. „Hún getur ekkert haldið eftir vörslufé. Það eru allir lögfræðingar sammála um það," segir Andrés í samtali við Vísi.

Andrés Pétur hyggst einnig kæra málið til lögreglu.