Geir fundar með norrænum starfsbræðrum

Geir H. Haarde forsætisráðherra fundar í dag með norrænum starfsbræðrum sínum og forsætisráðherrum Eistlands, Lettlands og Litháens.

Fundurinn er haldinn í tengslum við þing Norðurlandaráðs sem hefst í Osló á morgun en lýkur á fimmtudag. Hefð er fyrir því að ráðherrarnir átta fundi daginn fyrir Norðurlandaráðsþing og verður fundurinn í ráðhúsi Oslóar.

Á morgun funda svo norrænu forsætisráðherrarnir einir auk þess sem þeir hitta forsætisnefnd Norðurlandaráðs og stjórnarleiðtoga Grænlands, Færeyja og Álands. Geir H. Haarde mun jafnframt sitja þing Norðurlandaráðs.