Strætó kvartar yfir aðstæðum á Hverfisgötunni

Reynir Jónsson, framkvæmdastjóri Strætó, segir að þar á bæ hafi menn ekki heyrt í konunni sem Vísir sagði frá fyrir helgi en hún varð fyrir heldur óskemmtilegri lífsreynslu í leið 13 á Hverfisgötunni þegar vagnstjórinn hótaði að henda henda henni út úr vagninum þegar hún kvartaði yfir aksturslagi hans.

Í framhaldi fréttaflutnings Vísis af málinu sendi Strætó frá sér yfirlýsingu þar sem atvikið var harmað og óskaði Reynir eftir því að konan hefði samband við Strætó til þess að þeir gætu beðið hafa afsökunar. Af því hefur þó ekki orðið enn. Reynir segir að aðstæður á Hverfisgötunni geri vagnstjórum kjög erfitt fyrir.

Að sögn Reynis hafa forsvarsmenn Strætó margsinnis kvartað til borgaryfirvalda yfir aðstæðum í götunni. „Einhverntíma var farið út í að fegra götuna með því að hlaða beð út í götuna þar sem trjám var plantað. Tréin eru löngu dauð en eftir standa þessir kubbar sem afar erfitt er fyrir vagnstjórana að forðast. Þeir aka því yfir þá með tilheyrandi höggum og skellum," segir Reynir.

Hann segir að engin viðbrögð hafi borist frá borginni vegna þessa en mörg ár séu síðan vagnstjórar hafi fyrst fært þetta í tal. Hann segir ástandið í götunni svo slæmt að dekk vagnana sem keyra Hverfisgötuna endist mun skemur en dekk á öðrum vögnum. „Það fara óþarflega mörg dekk á þessu," segir Reynir Jónsson, framkvæmdastjóri Strætó og segist vonast til að gatan verði tekin í gegn fyrr en seinna.