Áfram þvaglát og ólæti miðborginni um helgar

Ekkert lát virðist vera á því að fólki kasti af sér vatni á almannafæri eða hafi í frammi ýmiss konar ólæti í miðbænum um helgar þrátt fyrir að lögregla hafi tekið harðar á slíkum brotum undanfarna mánuði.

Þrjátíu manns voru gripnir í miðbænum um helgina, sextán aðfaranótt laugardags og fjórtán aðfaranótt sunnudags. Þetta voru tuttugu og níu karlar og ein kona.

Margir nýttu sér þann kost að ljúka málinu með sektargreiðslu en meðal þess sem fólkið gerði af sér var að kasta af sér þvagi á almannafæri, fleygja rusli, trufla umferð og kasta grjóti.

Þá var einn tekinn fyrir að torvelda störf lögreglumanna en sá sagðist ekki láta af þessari iðju nema að hann yrði handtekinn. Fór svo að honum varð að ósk sinni.