Flugriti sendur út til rannsóknar

Flugstjóri JetX-farþegavélarinnar, sem hafnaði utan brautar á Keflavíkurflugvelli í fyrrinótt, segist hafa fengið rangar upplýsingar um bremsuskilyrði á vellinum áður en hann lenti. Flugriti vélarilnnar verður sendur út til rannsóknar.

Þetta kemur fram í tilkynningu frá félaginu. Þar segir að við lok lendingarbruns eftir flugbrautinni hafi áhöfninni orðið ljóst að bremsuskilyrði væru algerlega ófullnægjandi og önnur en samkvæmt uplýsingum frá flugturni. Því hafi reynst erfitt að hafa stjórn á hraða vélarinnar eftir lendingu.

Tvær vélar Icelandair hættu við lendingu á Keflavíkurflugvelli í þessa sömu nótt vegna upplýsinga um léleg skilyrði á flugbrautunum og héldu til Egilsstaða og aðrar tvær biðu í hringflugi eftir því að lendingarskilyrði yrðu viðunandi.

Tjá sig ekki um orð flugstjórans

Rannsóknanefnd flugslysa rannsakar máli JetX-vélarinnar sem alvarlegt flugatvik. Flugriti hennar verður sendur út til aflestrar og þá kemur meðal annars í ljós hvort vélin hafi lent of innarlega á brautinni og hvort brensuskilyrði hafi verið undir lágmarki.

Friðþór Eydal, upplýsingafulltrúi Flugmálastjórnarinnar á Keflavíkurflugvelli, sagði í samtali við Vísi að þar á bæ myndu menn ekki tjá sig um orð flugstjóra vélarinnar. Flugmálastjórn ynni að rannsókn málsins í samvinnu við Rannsóknarnefnd flugslysa og þangað til niðurstöður rannsóknarinnar lægju fyrir myndi flugmálastjórnin ekki tjá sig.