Vill endurbætur á vegi vegna mikillar umferðar

Einar Örn Thorlacius, sveitarstjóri í Hvalfjarðarsveit, hefur óskað eftir fundi með samgönguráðherra til þess að ræða mikla aukningu á umferð á veginum undir Hafnarfjalli á síðustu árum og þarfar endurbætur á honum.

Í samtali við Vísi segir Einar að vegurinn sé slæmur. „Hann er hæðóttur og krókóttur og það eru nokkur hættuleg vegamót þarna, til að mynda í Leirársveitina og Melasveitina," segir Einar. Hann telur að umferðaraukninguna megi meðal annars rekja til mikils uppgangs hjá háskólunnum á Bifröst og Hvanneyri, hvort tveggja séu nú blómstrandi háskólabæir.

Einar segist hafa pantað tíma hjá samgönguráðherra til þess að ræða málið og sömuleiðis stöðu hringvegarins sem liggi í gegnum Hvalfjarðarsveit endilanga frá Hvalfjarðargöngum langleiðina að Borgarfjarðarbrú. „Við viljum hvaða hugmyndir ráðherra hafi um framtíðarveglínu hringvegarins, það er hvorum megin Akrafjalls hann muni liggja," segir Einar.

Vegurinn liggur nú norðan Akrafjalls en vegstæðið er fremur þröngt til að breikka veginn. Verið er að skoða hugmyndir um að leggja hann sunnan megin fjallsins og með tengingu yfir Grunnafjörð. Einar segir að nokkur andstaða hafi verið við þá hugmynd því Grunnafjörður sé friðlýstur. Þá segir Einar að ráðherra verði inntur eftir því hvaða hugmyndir ráðherra hafi um veginn, það er hvort hann verði 2+1 eða 2+2 í framtíðinni.

Auk þess hyggst Einar kynna fyrir ráðherra skýrslu sem sveitarfélagið lét verkfræðistofu vinna fyrir sig um hættuleg gatnamót í sveitarfélaginu. Bendir hann meðal annars á vegamót hringvegarins og Akrafjallsvegar annars vegar og Hvalfjarðarvegar hins vegar sem dæmi. Skýrslan hefur þegar verið kynnt vegamálastjóra og segir Einar að vegamálastjóri hafi hrósað sveitarstjórnarmönnum í Hvalfjarðarsveit fyrir að hafa látið vinna skýrsluna að eigin frumkvæði.