Óvenjuleg halastjarna sést með berum augum

Óvenjuleg halastjarna, sem að jafnaði er svo dauf að hún sést ekki nema í öflugum sjónaukum, sést nú allt í einu með berum augum, ef skyggni er gott.

Halastjarnan, sem kennd er við Edwin Holmes, sem fann hana árið 1892, blossaði upp um miðjan janúar árið eftir og síðan sást hún dauflega árið 1906 en hvarf þá.

Eftir mikla leit og útreikninga fannst hún aftur árið 1964 og síðan hafa menn séð hana afar daufa á sjö ára fresti þar til 24. október síðastliðinn að hún blossaði aftur skyndilega upp.

Ljósmagnið jókst nær milljónfalt þannig að hún sést auðveldlega með berum augum en fljótlegra er þó að finna hana með litlum handsjónauka. Ekki er vitað hvernig stendur á hinni gríðarlegu birtuaukningu.

Fyrri hluta kvölds er hún hátt á lofti í austnorðausturátt. Ljóshjúpur eða rykhjúpur umlykur kjarnann og er hjúpurinn um milljón kílómetrar í þvermál. Halastjarnan hreyfist hægt á himni og verður í stjörnumerkinu perseusi í næsta ánuði.