Staðfesti að Vilhjálmur hafi kynnt REI málið fyrir forsætisráðherra

Vilhjálmur Þ. Vilhjálmsson, þáverandi borgarstjóri, kynnti samruna Geysis Green Energy og Reykjavík Energy Invest fyrir Geir H. Haarde, forsætisráðherra, áður en kynningarfundur var haldinn um málið fyrir þáverandi borgarstjórnarmeirihluta. Þetta staðfesti Jón Kristinn Snæhólm, fyrrverandi aðstoðarmaður Vilhjálms, í samtali við Vísi.

Jón ítrekar þó að á þeim tímapunkti hafi hvorki Vilhjálmur né Geir vitað af þeim ákvæðum er sneru að kauprétti starfsmanna REI og 20 ára einkarétti REI á öllum verkefnum Orkuveitu Reykjavíkur á erlendri grund.

Jón sagðist ennfremur hafa sett sig í samband við Vilhjálm sem hefði staðfest þetta.

Fréttin birtist fyrst á Vísi klukkan 15.37. Laust eftir klukkan fjögur eða um hálftíma síðar hafði Jón Kristinn hins vegar samband við Vísi og sagðist hafa misskilið orð fyrrverandi borgarstjóra. Dró hann til baka þær fullyrðingar um að Vilhjálmur hefði hitt Geir og kynnt samruna fyrirtækjanna sérstaklega.

Það skal tekið fram að fréttin eins og hún birtist fyrst á Vísi var lesin fyrir Jón Kristinn. Gerði hann þá engar athugasemdir við þau ummæli sem höfð voru eftir honum þar.

Björn Ingi Hrafnsson, borgarfulltrúi Framsóknarflokksins, segir á heimasíðu sinni að Vilhjálmur Þ. Vilhjálmsson, þáverandi borgarstjóri, hafi kynnt samrunahugmyndir Geysis Green Energy og Reykjavík Energy Invest fyrir Geir H. Haarde forsætisráðherra áður en kynningarfundur var haldinn um málið fyrir þáverandi borgarstjórnarmeirihluta. Segir Björn Ingi ennfremur að forsætisráðherra hafi tekið vel í hugmyndina.

Geir H. Haarde, forsætisráðherra, hefur hingað til neitað að svara spurningum fjölmiðla vegna málsins.