Sakar Neytendasamtökin um hótanir

Formaður Tannlæknafélags Íslands segir Neytendasamtökin hafa staðið í hótunum í tengslum við könnun samtakanna á verðskrá tannlækna. Samtökin birtu lista þeirra tannlækna sem ekki svöruðu könnuninni. Eðlileg vinnubrögð segir formaður Neytendasamtakanna.

„Í stað þess að leita samstarfs þá stóðu þeir í hótunum," sagði Sigurjón Benediktsson, formaður Tannlæknafélags Íslands, í samtali við Vísi. „Ég svara ekki spurningum undir hótunum."

Neytendasamtökin sendu öllum starfandi tannlæknum bréf í byrjun septembermánaðar þar sem þeir voru beðnir um að fylla út verð fyrir 13 aðgerðarliði. Bréfin voru send til 224 tannlækna en 82 ákváðu ekki að svara þar á meðal Sigurjón Benediktsson. Í bréfi samtakanna kom fram að nöfn þeirra sem neituðu að svara yrðu birt sérstaklega.

Sigurjón telur ekki rétt að samtökin birti nöfn þeirra sem kjósa að svara ekki. „Ég svara ekki bréfum á þessum forsendum en öðrum félögum er hins vegar frjálst að gera það." Sigurjón segist hafa sent Neytendasamtökunum bréf þar sem þessum vinnuaðferðum var mótmælt. Þá hafi hann einnig boðið samtökunum upp á samstarf í tengslum við könnunina. Því bréfi hafi hins vegar aldrei verið svarað. „Ég er ekki á móti verðkönnuninni sem slíkri heldur fyrst og fremst þessum vinnuaðferðum."

Jóhannes Gunnarsson, formaður Neytendasamtakanna, segir samtökin hafa það sem vinnureglu að birta nöfn allra sem ekki svara í könnunum. „Við fengum bréf frá Tannlæknafélaginu þar sem þessari vinnureglu var mótmælt. Við sendum svar til baka þar sem við útskýrðum okkar afstöðu. Við vorum ekki að hóta einum eða neinum. Okkur þótti rétt að láta tannlækna vita fyrirfram af þessari vinnureglu. Að sjálfsögðu höfum ekkert á móti samstarfi."