Saman í forvali vegna nýs Herjólfs

Vestmannaeyjabær og Vinnslustöðin hafa komist að samkomulagi um að taka saman þátt í forvali vegna útboðs á rekstri ferju sem ætlað er að sigla milli Eyja og Bakkafjöru.

Hafa aðilarnir í hyggju að stofna sérstakt félag um reksturinn sem bjóði í rekstur og smíði nýs Herjólfs. Fram kemur í tilkynningu frá Vestmannaeyjabæ og Vinnslustöðinni að sóknarfæri séu bæði fyrir íbúa og atvinnulíf með tíðari ferðum milli lands og Eyja og að sömuleiðis felist viðskiptatækifæri í að eiga og reka ferjuna.

Bent er á að báðir aðilar búi yfir mikilli reynslu og þekkingu á skiparekstri. Vestmannaeyjabær hafi til að mynda verið einn aðaleigandi og rekstraraðili Herjólfs á árunum 1976 til 2001 og þá sé Vinnslustöðin umsvifamikil í útgerð og geri út átta skip og báta. Þá sé þekking Vinnslustöðvarinnar á íslensku sem erlendu viðskiptalífi mikil. Vinnslustöðin hafi á að skipa sérfræðingum eins og skipaverkfræðingum, vélfræðingum og skipstjórnendum.

Fram kemur í tilkynningu Vestmannaeyjabæjar og Vinnslustöðvarinnar að í forvalinu felist engar skuldbindingar aðrar en þær að eiga möguleika á þáttöku í útboðinu sjálfu. Enn hafi ekki verið unnið tilboð í rekstur og smíði Herjólfs, einungis sé um forval að ræða fyrir útboðið. Slíkt tilboð verið gert ef aðilarnir tveir verði valdir til þátttöku í útboðinu sjálfu.