Hættir hjá Strætó í haust

 Ármann Kr. Ólafsson, stjórnarformaður Strætó, hyggst segja stöðu sinni lausri áður en þing kemur saman í haust. Fundað var um málið á mánudag.

„Ég ætla mér ekki að gegna öllum stöðum að eilífu,“ segir hann. „Ég hætti sem forseti bæjar­stjórnar í Kópavogi fyrir nokkrum dögum og hafði alltaf hugsað mér að hætta sem stjórnarformaður Strætó áður en þing kemur saman á ný.“

Á fundi sem stjórn Strætó og bæjarstjórar sveitarfélaga á höfuðborgarsvæðinu sátu á mánudag bar afsögn Ármanns á góma. Þó var ekkert ákveðið í þeim efnum. Þar var samþykkt tillaga um að óska eftir viðræðum við ríkisvaldið um þátttöku þess í kostnaði við almenningssamgöngur á höfuðborgarsvæðinu.

„Það er kannski ekki albesta fyrirkomulagið að þingmaður sé stjórnarformaður Strætó,“ segir Vilhjálmur Þ. Vilhjálmsson borgarstjóri. „Því er skiljanlegt að Ármann ætli að hætta þar sem hann er að setjast á þing í haust.“

Aðspurður hver eftirmaður Ármanns verði segir Vilhjálmur þá ákvörðun í höndum stjórnar Strætó. „Það er ekkert útilokað að hann komi úr Reykjavík.“