Globodent í vandræðum

Globodent, norðlenskt fyrirtæki sem boðaði alheimsbyltingu í tannlækningum hefur misst tiltrú fjárfesta. Akureyrarbær lagði á sínum tíma milljónatugi í fyrirtækið.

Hugmynd Egils Jónssonar tannlæknis á Akureyri þótti nýstárleg og var vonast til að ný tækni yrði tekin upp út um allan heim, eins og nafnið, Globodent, gaf til kynna. Bora átti í tennur fólks með sérhönnuðu tæki og koma fyrir stöðluðum plast- og postulínsfyllingum. Það átti að draga úr tannlæknakostnaði og gera vinnu tannlækna þægilegri og fækka atvinnusjúkdómum þeirra.

En nú nokkrum árum síðar er Globodent komið í vandræði. Fjárfestar ákváðu á síðasta hluthafafundi að hætta stuðningi við fyrirtækið, þeir hafa ekki lengur trú á verkefninu. Akureyrarbær ákvað á sínum tíma að verja tugum milljóna af fé skattgreiðenda í hlutafé Globodent og það var umdeild ákvörðun.

Auk Akureyrarbæjar eru hluthafar Byggðastofnun, Tækifæri og Nýsköpunarstofnun en stærstan hlut á þó Egill Jónsson tannlæknir sjálfur. Ekki náðist í hann við vinnslu fréttarinnar. Stjórnarformaður Globodent, Sigurður Þorsteinsson, segir ómögulegt að segja til um hvort hlutaféð í fyritækinu teljist glatað nú en hlutaféð hljóp á hundruðum milljóna. Hann segir að þótt viðskiptahugmynd Globodent sé góð hafi hún e.t.v. reynst of stór biti fyrir aðila hér innanlands. Reynt verði á næstunni að selja fyrirtækið til útlanda.