Meintur árásarmaður í gæsluvarðhaldi fram á mánudag

Héraðsdómur Suðurlands úrskurðaði í hádeginu manninn sem hefur verið í haldi lögreglunnar á Selfossi, vegna hnífstungumálsins við Hellisheiðarvirkjun um síðustu helgi, í gæsluvarðhald til mánudagsins 26. nóvember.

Fram kemur á vef lögreglunnar að eftir sé að ræða við fjölda starfsmanna sem var í húsinu þar sem atvikið átti sér stað en á bilinu 40-50 manns voru þar að horfa á knattspyrnuleik.

Maðurinn sem úrskurðaður var í gæsluvarðhald neitar að hafa verið með hníf í umrætt sinn. Beinist rannsókn lögreglunnar nú að því að leita sjónarvotta og upplýsinga um það hvort maðurinn hafi verið með hníf í fórum sínum eða hugsanlega annað áhald þegar hann kom í heimsókn í svefnbúðirnar síðastliðið laugardagskvöld.