REI á að skila inn tilboði í filippseyskt jarðvarmafyrirtæki á morgun

Reykjavík Energy Invest og samstarfsaðili þess á Filippseyjum eiga á morgun að skila inn tilboði í 60 prósenta hlut filippseyska ríkisins í stærsta jarðavarmafyrirtæki Filippseyja, PNOC-EDC.

Fram kemur á vefsíðu Manila Bulletin að þau fyrirtæki sem ætla að bjóða í hlutinn verði að skila inn tilboði til Þróunarbanka Filippseyja á morgun. Eftir því sem fréttastofa kemst næst verður málshraðinn nokkuð mikill og ætti það að liggja fyrir í næstu viku við hvaða bjóðendur filipseyska ríkið gengur til samninga.

Hafliði Helgason, upplýsingafulltrúi REI, sagði fyrirtækið ekki geta tjáð sig um tilboðið í PNOC-EDC þar sem það væri bundið trúnaði í tengslum við einkavæðingu filippseyska fyrirtækisins.

Töluverð óvissa hefur verið um framtíðaráform REI eftir að nýr meirihluti tók við völdum í borginni en fram kom í fréttum fyrr í mánuðinum að Orkuveita Reykjavíkur hefði samþykkt á styðja áfram við þáttttöku REI í einkavæðingu PNOC-EDC. Með því væri verið að standa vörð um hagsmuni almennings þar sem þegar hefði talsverðum fjármunum verið varið í verkefnið og verulegir hagsmunir væru í húfi. Þá þyrfti að standa vörð um trúverðugleika REI.

Fram hefur komið að REI og Geysir Green Energy standi að tilboði í PNOC-EDC í bandalagi við filipseyska fyrirtækið First Gen Corporation sem er stærsta orkufyrirtæki Filippseyja í einkaeigu.

Um er að ræða 40 prósenta hlut í PNOC-EDC en honum fylgir 60 prósent af atkvæðarétti í félaginu. Ljóst er að REI og GGE munu ekki eignast meirihluta í félaginu því þau skilyrði eru sett fyrir kaupunum að innlendur aðili eigi 60 prósent af þeim hlut sem boðinn er út.