Hagstjórn í molum og spár út í hafsauga

Formaður Vinstri grænna segir hagstjórnina í molum og efnahagsspár út í hafsauga. Formaður Framsóknarflokksins segir að of langt hafi verið gengið í niðurskurði þorskheimilda og mótvægisaðgerðir stjórnvalda séu ómarkvissar.

Tvennar utandagskrárumræður voru á Alþingi í dag. Steingrímur J. Sigfússon formaður Vinstri grænna sagði innlendar sem erlendar skýrslur sýna fram á mikla veikleika í efnahagsstjórninni.

Steingrímur sagði það blasa við að hagstjórnin væri í molum og allar efnahagsspár úti í hafsauga.

Vísaði Steingrímur til þess að spár um minnkandi viðskiptahalla rættust ekki og hefði hann verið um 25 prósent í fyrra, tvöfalt hærri en spáð hefði verið. Þá sagði hann stjórnvöld ekkert gera til á slá á þensluna og vísaði þar til áforma um miklar framkvæmdir í samgöngumálum, hjá háskólunum, byggingu húsa eins og tónlistarhúss og Landsspítala og stóriðjuáform, með tilheyrandi skuldasöfnun þjóðarbúsins í útlöndum.

Geir H. Haarde forsætisráðherra sagði hallann á viðskiptum við útlönd að mestu ráðast af framkvæmdum einkaaðila, ekki ríkisins. Forsætisráðherra sagði að þingmaðurinn yrði að átta sig á því að það ríktu lög um frjálst flæði fjármagns á Íslandi og það væri ekki á stefnuskrá núverandi ríkisstjórnar að breyta því.

Guðni Ágústsson formaður Framsóknarflokksins hóf umræðu um mótvægisaðgerðir ríkisstjórnarinnar, eftir niðurskurð á þorskheimildum, sem hann sagði að hefði verið allt of mikill og mótvægisaðgerðirnar fálmkenndar. Hann sagði að ekki hefði verið nægjanlega hugað að hagsmunum sveitarfélaganna, sjómanna og fiskverkafólks í mótvægisaðgerðunum.

Forsætisráðherra sagðist ráða það af fréttatilkynningu frá Framsóknarflokknum að flokkurinn vildi fara gamaldags leiðir útdeilingar fjármuna úr sjóðum. Það hefði verið gert á árum áður með hörmulegum árangri.