Alþjóðlegur landgræðsluskóli á Íslandi

Ingibjörg Sólrún Gísladóttir, utanríkisráðherra, og Ágúst Sigurðsson, rektor Landbúnaðar­háskóla Íslands, undirrituðu í dag þriggja ára verksamning um uppbyggingu alþjóðlegs landgræðsluskóla til þjálfunar fólks frá þróunarríkjum í landgræðslu og jarðvegsvernd.

Í fréttatilkynningu frá Utanríkisráðuneytinu kemur fram að bóklegi hluti námsins fari að mestu leyti fram í Landbúnaðarháskólanum á Hvanneyri en starfsþjálfun hjá Landgræðslu ríkisins í Gunnarsholti.

Nú er að ljúka fyrsta sex vikna námskeiði á vegum verkefnisins, og hafa dvalið hér á landi í starfsþjálfun fimm nemendur með tilheyrandi undirbúningsmenntun frá Egyptalandi, Mongólíu, Túnis og Úganda. Næsta ár verður námstíminn lengdur upp í sex mánuði.