Ekkert barnaklám í tölvu Ágústs

Ekkert barnaklám fannst við leit í tölvu Ágústs Magnússonar, dæmds barnaníðings, að sögn Brynjars Níelssonar skipaðs verjanda hans. Lögreglan haldlagði tölvu hans fyrir tíu mánuðum síðan og er rannsókn lokið á gögnum sem í henni voru.

Ágúst er einn þeirra sem staðinn var að því að sækjast eftir samskiptum við ólögráða stúlku í svokölluðu Kompásmáli. Þrátt fyrir að dæmt hafi verið í máli þriggja manna í dag vegna samskipta þeirra við Kompástálbeituna er mál Ágústs enn í rannsókn og var hann í skýrslutöku hjá lögreglu í dag.

Ágúst sótti um reynslulausn fyrir mánuði síðan en þá var beiðni hans hafnað á þeirri forsendu að mál hans væri ennþá í rannsókn. Brynjar Níelsson segir það vera mjög óalgengt að menn afpláni jafn stóran hluta af dómum og Ágúst er þegar búinn að gera.

Brynjar segir að Ágúst óttist að rannsóknin á máli hans sé látin dragast gagngert til þess að koma í veg fyrir að hann fái reynslulausn úr fangelsi. Engin önnur skýring hafi verið gefin á töfum á rannsókn í máli hans. Þessu höfnuðu Valtýr Sigurðsson fangelsismálastjóri og Björgvin Björgvinsson, yfirmaður kynferðisbrotadeildar lögreglunnar á höfuðborgarsvæðinu þegar Vísir hafði samband við þá.