Öryggiskerfi í sundlaug yfirfarið eftir banaslys

Öryggiskerfi Sundlaugar Kópavogs hefur verið vandlega yfirfarið eftir sviplegt slys síðastliðið vor sem dró ungan pilt í skólasundi til dauða. Niðurstaða lögreglurannsóknar var að um slys hefði verið að ræða og staðfesti ríkissaksóknari hana. Strax eftir slysið voru allir öryggisþættir skoðaðir og yfirfarnir, eftir því sem fram kemur í tilkynningu frá Kópavogsbæ.

„Öryggiskerfi laugarinnar er tvískipt. Annarsvegar er eftirlit með myndavélum sem eru hjálpartæki og hinsvegar laugarvarsla þar sem laugin er skimuð af laugarvörðum. Farið var yfir myndavélaeftirlitið og upptaka tengd við myndavélar undir vatnsyfirborði. Enn fremur var ákveðið að laugarverðir gangi nær bakkanum en áður til að greina betur allt sem er næst honum. Þá var haldinn fundur með skólastjórnendum, sundkennurum og forstöðumönnum sundlauga auk starfsmanna skólaskrifstofu og íþrótta- og tómstundaráðs Kópavogs um öryggi á sundstöðum, viðbrögð þegar slys ber að höndum og samráð hlutaðeigandi aðila," segir í tilkynningunni.

Þá kemur fram að allt öryggiskerfi Sundlaugar Kópavogs verði yfirfarið og endurskoðað þegar nýbygging laugarinnar verður tekin í notkun á næsta ári. Nauðsynlegt verði að samkeyra alla öryggisþætti við nýtt mannvirki. Einnig verði haldinn samráðsfundur með sundkennurum, forstöðumönnum sundlauga og vaktstjórum í byrjun næsta árs og muni þeir samráðsfundir verða fastur liður á hverju hausti hér eftir. Á þessum fundum verður farið yfir gildandi verkferla og neyðaráætlanir sundlauganna.