Vilja fullan aðskilnað ríkis og kirkju

Heimdallur, félag ungra sjálfstæðismanna í Reykjavík, hvetur stjórnvöld til þess að styðja hugmyndir Björns Bjarnasonar dóms- og kirkjumálaráðherra um að leggja niður ráðuneyti kirkjumála. Björn vakti máls á þessu í ræðu sinni á Kirkjuþingi um síðustu helgi og vildi færa málefni kirkjunnar undir forsætisráðuneytið.

Heimdellingar vilja þó ganga enn lengra og aðskilja ríki og kirkju að fullu þannig að kirkjan og önnur trúfélög starfi á jafnréttisgrundvelli. Í yfirlýsingu frá Heimdalli er bent á að undanfarin ár hafi dómsmálaráðherra átt forgöngu um samningaviðræður sem hafi leitt til aukins sjálfstæðis þjóðkirkjunnar með tilfærslu á ýmsum verkefnum frá kirkjumálaráðuneyti til kirkjunnar.

Í dag séu eingöngu örfá verkefni á höndum kirkjumálaráðherra sem snúa beint að þjóðkirkjunni og þörfin fyrir sérstakt kirkjumálaráðuneyti því ekki lengur fyrir hendi.