Forsetinn leiddi Össur inn í prívatíbúðina

Í bráðskemmtilegri færslu á bloggsíðu sinni greinir Össur Skarphéðinsson iðnaðaráðherra frá óvæntum fundi sínum með forseta Indónesíu. Endaði langur fundur þeirra með því að forsetinn dró Össur með sér inn í prívatíbúð sína og höfðu viðstaddir þrír ráðherrar landsins aldrei kynnst öðru eins.

Færlsan er svona: "Fundur okkar stóð þó þrisvar sinnum lengur en áformað var, og svo mikill var áhugi forsetans að fyrr en ég vissi tók hann undir hönd mína og rauk með mig út úr skrautsalnum í forsetahöllinni og inn í litla prívatíbúð sína meðan ráðherrarnir þrír sem hann hafði kallað á fundinn, stóðu steini lostnir og kváðust aldrei hafa séð svona fyrr. Inni dró hann fram kort af Indónesíu til að sýna mér hvar honum fyndist að Íslendingar ættu að reisa jarðorkuver. Gott ef það voru ekki þrjár sojaflöskur sem hann notaði til að halda kortinu réttu á borðinu."

Össur er í opinberri heimsókn í Indónesíu til viðræðna við orkumálaráðherra landsins og var fundur með forsetanum alls ekki á dagskrá. Forsetinn hefur hinsvegar mjög mikinn áhuga á frekari samskiptum við Íslendinga og því boðaði hann Össur óvænt á sinn fund.