Hraðakstursbrotum fjölgar um 50 prósent milli ára

Nærri 3.800 hraðkstursbrot komu inn á borð lögreglunnar í september síðastliðnu sem er nærri fimmtíu prósentum fleiri brot en í sama mánuði í fyrra og hitteðfyrra.

Þetta kemur fram í afbrotatölfræði Ríkislögreglustjóra fyrir septembermánuð. Alls var tilkynnt um 219 innbrot í mánuðinum og 139 greindu frá líkamsmeiðingum sem er nokkur fjölgun frá september síðustu tveggja ára. Áfengislagabrot voru hins vegar færri en í september 2005 og 2006.

Tölfræði Ríkislögreglustjóra leiðir enn fremur í ljós að 57 prósent ölvunarakstursbrota í september hafi verið framin að nóttu til og þriðjungur fíkniefnabrota á sama tíma. Hins vegar var nærri helmingur þjófnaðarbrota í mánuðinum framinn á daginn, milli hádegis og sex síðdegis.

Þegar horft er til fyrstu níu mánaða ársins kemur í ljós að flestar tilkynningar um eignaspjöll bárust í febrúar og september eða 347. Þá voru innbrotin flest í janúar þegar lögreglan fékk tæplega 300 tilkynningar. Flestar tilkynningar um líkamsmeiðingar og líkamsárásir voru hins vegar skráðar í júlí en fæstar í febrúar.