Fjárdráttarkærur velkjast um hjá lögreglu

Kærur Tryggingastofnunar um fjárdrátt upp á eitthvað á annað hundrað milljónir króna velkjast nú hjá lögregluembættum án þess að ákærur séu gefnar út. Forstjóri stofnunarinnar segir þetta vekja spurningar um framgang réttvísinnar.

Lögregla rannsakar nú meint misferli tannlæknis gagnvart Tryggingastofnun. Samkvæmt heimildum fréttastofunnar er upphæðin sem stofnunin telur að hann hafi dregið sér með ólögmætum hætti mun hærri en sú sem talið er að svæfingalæknir hafi dregið sér af stofnuninni með fölsuðum reikningum.

Við greindum frá því í gær að í tilviki svæfingalæknisins væri grunur um fjárdrátt upp á hátt í 12 milljónir. Það mál var kært til lögreglu snemma á árinu en er enn í rannsókn. Mál tannlæknisins var kært til efnahagsbrotadeildar Ríkislögreglustjóra fyrir rúmu ári en hún sendi það til frekari rannsóknar hjá lögreglu í heimabyggð tannlæknisins sem ekki hefur enn lokið rannsókn.

Þá hefur lögregla heldur ekki lokið rannsókn á meintum fjárdrætti starfsmanns stofnunarinnar upp á 75 milljónir, sem kærður var í júní í fyrra.

Karl Steinar Guðnason, forstjóri Tryggingastofnunar, segir að fleiri mál séu til rannsóknar hjá lögreglu og nú leggi stofnunin áherslu á að að þessi mál firnist ekki í höndum lögreglunnar.