Upplýsingar um leigukostnað utanríkisráðuneytis ekki til reiðu

Í frétt á norska vefmiðlinum E24 kemur fram að húsaleiga fyrir norska sendiherrabústaði er himinhá í sumum tilfellum. Þannig er leigan á sendiherrabústaði Norðmanna í London heilar 18 milljónir íslenskra króna á mánuði. Vísir leitaði upplýsinga hjá utanríkisráðuneytinu um húsaleigukostnað á vegum Íslensku sendiráðanna, og sundurliðun á því hvar húsnæði er leigt og hvar það hefur verið keypt.

Hjá ráðuneytinu fengust þau svör að slíkar upplýsingar hefðu aldrei verið teknar saman á einum stað. Á því væri þó verið að ráða bót og til standi að gera þær upplýsingar aðgengilegar innan tíðar.

Hjá íslenskum stjórnvöldum hefur það þó verið reglan frekar en undantekning að sendiráðsbústaðirnir séu í eigu ríkisins en ekki leigðir. Það er því ólíklegt að íslenskir skattgreiðendur þurfi að punga út fyrir húsaleigu á borð við þá sem frændur okkar í Noregi gera í London.