Meiðyrðamál Ómars gegn Gauki tekið fyrir

Meiðyrðamál almannatengilsins Ómars R. Valdimarssonar gegn sjónvarpsmanninum Gauki Úlfarssyni verður tekið fyrir í Héraðsdómi Reykjavíkur í dag.

Málið á rætur sínar að rekja til skrifa Gauks, sem þekktastur er fyrir framleiðslu sína á sjónvarpsefni um Silvíu Nótt, á bloggsíðu sína.

Færsla sem Gaukur birti þann 24. apríl síðastliðinn, og fjallaði um Ómar og störf hans fyrir ítalska verktakafyrirtækið Impregilo, bar fyrirsögnina: "Aðal Rasisti Bloggheima"

Ómar hafði samband við Gauk vegna þessa og bað hann um að fjarlægja færsluna. Þegar Gaukur varð ekki við því ákvað Ómar að höfða mál. Hann fer fram á tvær milljónir í skaða- og miskabætur auk þess sem hann krefst þess að Gaukur greiði honum átta hundruð þúsund krónur fyrir birtingu á dómsúrskurði í þremur dagblöðum.

Færslu Gauks um Ómar má lesa hér