Vilja kæra þýskt-pólskt fyrirtæki fyrir ólögmæta starfsemi

Óhjákvæmilegt er að þýsk-pólska þjónustufyrirtækið Hunnenbeck verði kært fyrir ólögmæta starfsemi hér á landi að mati Starfsgreinasambands Íslands. Þetta kemur fram í yfirlýsingu frá sambandinu. Gerðar eru alvarlegar ahugasemdir við samvinnu GT verktaka við fyrirtækið og því haldið fram að hér á landi séu starfandi fjöldi manns án dvalarleyfis og utan við skattar og skyldur.

Í yfirlýsingu Starfsgreinasambands Íslands kemur fram að hið þýsk-pólska fyrirtæki Hunnenbeck vinni í samstarfi við starfsmannaleiguna Nordic Construction Line sem sé skráð í Lettlandi. Það fyrirtæki sjái GT verktökum fyrir ódýru vinnuafli. Ennfremur segir að Hunnenbeck hafi verið með starfsemi hér á landi síðan í síðastliðnum júnímánuði án þess að hafa verið skráð og því hafi starfsemi þess verið ólögmæt. Fram kemur í yfirlýsingunni að Marteinn Másson, lögmaður Hunnenbeck á Íslandi, hafi skráð fyrirtækið fyrst í dag.

Sambandið dregur ennfremur í efa að Hunnenbeck geti sýnt fram á að það hafi staðið við kjarasamninga hér á landi og að starfsmenn á þess vegum séu tryggðir á Evrópska efnahagssvæðinu. Að mati sambandsins er óhjákvæmilegt að fyrirtækið verði kært fyrir ólögmæta starfsemi.

Yfirlýsing sambandsins kemur í kjölfar rútuslyss sem átti sér stað í Besstaðabrekku í síðustu viku. Um borð í rútunni var hópur erlendra verkamanna sem reyndist ólöglegur hér á landi.

Að mati sambandsins virðist lítið samráð vera meðal stjórnvalda í málefnum útlendinga á íslenskum vinnumarkaði. Sambandið telur allar líkur benda til þess að hér á landi séu starfandi fjöldi manns án dvalarleyfis og utan við skattar og skyldur. Þá kemur einnig fram í yfirlýsingunni að yfirtrúnaðarmaður sambandsins á Kárahnjúkasvæðinu hafi vakið athygli Vinnumálastofnunar á meintri ólögmætri starfsemi GT verktaka.