Brotalamir í framkvæmd laga um réttindi erlendra starfsmanna valda því að sum fyrirtæki koma sér hjá því að skrá erlenda verkamenn hérlendis. Um er að ræða innlend og erlend fyrirtæki og sum þeirra hafa margsinnis gerst sek um að brjóta á réttindum starfsmanna. Þverpólitísk samstaða náðist innan félags- og tryggingamálanefndar í dag um að herða eftirlit og gera lögin skilvirkari.
„Þetta eru sömu aðilarnir sem leika þennan ljóta leik," sagði Ögmundur Jónasson, þingflokksformaður Vinstri grænna og fulltrúi flokksins í félags- og tryggingamálanefnd, í samtali við Vísi. „Það þarf að bæta lögin og eftirfylgni þeirra."
Fram kom í fjölmiðlum í síðustu viku að tugir starfsmanna við Kárahnjúka séu án tilskilinna leyfa hér á landi. Félags- og tryggingamálanefnd fundaði um málið í dag og ræddi nefndin meðal annars við fulltrúa Vinnumálastofnunar, Alþýðusambands Íslands. og yfirtrúnaðarmann við Kárahnjúka.
Að sögn Ögmundar var fundurinn í dag afar gagnlegur. „Það var enginn ágreiningur milli manna og það náðist þverpólitísk samstaða um að koma þessum málum í lag."
Guðbjartur Hannesson, formaður félags- og tryggingamálanefndar, sagði í samtali við Vísi að brotalamir í framkvæmd laga um réttindi erlenda starfsmanna geri það að verkum að réttindi þeirra séu ekki alltaf tryggð. „Það er erfitt að glíma við fyrirtæki sem koma inn á markaðinn í skamman tíma og beita fyrir sig ákvæðum um að hingað megi koma fólk í stuttan tíma til að vinna. Þegar á að ganga á fyrirtækin varðandi réttindi starfsmanna þá eru þau farin úr landi."
Guðbjartur segir engar endanlegar tölur liggja fyrir um hversu margir erlendir verkamenn séu hér á landi án þess að vera skráðir. Hann bendir á að nú sé nefnd á vegum félagsmálaráðuneytisins að störfum sem eigi að leggja fram tillögur um hvernig megi bæta eftirfylgni laga um réttindi erlendra starfsmanna. Nefndin á að ljúka störfum 1. nóvember næstkomandi.
„Eins og staðan er núna ná eftirlitsstofnanir ekki til verkamannanna. Það þarf að bæta úr þessu og samstilla átakið til að eftirlitið virki betur. Almennt eru þó fyrirtæki að standa sig með miklum sóma og þetta eru einstakir hnökrar sem þarf að slípa til."
