Á annað þúsund manns mótmæla niðurrifi Pakkhússins á Selfossi

Á annað þúsund manns hafa skrifað undir áskorun til bæjaryfirvalda á Selfossi að þyrma Pakkhúsinu. Pakkhúsið, sem var reist árið 1941 af Kaupfélagi Árnesinga, á að víkja fyrir nýju skipulagi í miðbæ Selfoss. Frestur til að skila inn athugasemdum við skipulagið rann út á föstudag.

Hátt á annað hundrað manns hafa skráð sig sem stofnfélaga í samtökum til bjargar Pakkhúsinu á Selfossi. Pakkhúsið stendur sunnan við bæjarskrifstofurnar á Selfossi og hýsir nú Rannsóknarmiðstöð í jarðskjálftaverkfræði.

Árni Valdimarsson, talsmaður hollvinasamtaka Pakkhússins, segir að samtökin hafi safnað undirskriftum undanfarið til að skora á bæjaryfirvöld að hætta við áform um niðurrif hússins. Hann segir að yfir níutíu prósent þeirra sem samtökin hafi haft samband við skrifi nafn sitt á þessa áskorun.

Árni segir að samtökin ætli að berjast fyrir því að Pakkhúsið muni standa áfram til prýði fyrir Selfossbæ. Hann segist ekkert skilja í því hvers vegna bæjaryfirvöld vilji að húsið víki.

Að sögn Ragnheiðar Hergeirsdóttur, bæjarstjóra Árborgar, rann frestur til að gera athugasemdir við deiliskipulagið sem gerir ráð fyrir niðurrifi Pakkhússins, út á síðastliðinn föstudag.

Bæjarstjórinn á Selfossi segir að endanleg ákvörðun um afdrif hússins verði tekin í framhaldi af skoðun á öllum athugasemdum sem berast við deiliskipulagið.

Starfsfólkið í Pakkhúsinu er flest andvígt því að húsið víki og þeir starfsmenn sem Stöð 2 ræddi við sögðust einfaldlega ekki trúa því að til þess kæmi.

Árni Valdimarsson hefur barist lengi gegn áformum yfirvalda á Selfossi um að breyta ásýnd miðbæjarins. Hann hefur meðal annars staðið gegn hugmyndum um veg sem á að liggja í gegnum garðinn hans. Nýlega var lagður eldur að bílskúr sem er í byggingu við hús Árna en hann segir að það stöðvi sig ekkert í baráttunni.