Olíufélögin hækkuðu á sama tíma um sömu krónutölu - en N1 lækkaði aftur í dag

Talsmaður Atlantsolíu segir stórundarlegt að stóru olíufélögin hafi öll hækkað verð um sömu krónutölu á nákvæmlega sama tímanum. Stóru olíufélögin segja að heimsverðshækkun hafi áhrif til hækkunar hér.

Magnús Ásgeirsson hjá N1 segir að hækkunin hjá félaginu á föstudag hafi komið í framhaldi af hækkun á olíuverði á heimsmarkaði. Engu að síður lækkaði verðið á bensíni um 2 krónur í dag hjá N1.

Atlantsolía hækkaði hins vegar verð á bensíni í dag um eina krónu og fimmtíu aura en stóru olíufélögin hækkuðu verðið um tvær krónur á föstudag.

Að sögn talsmanns Atlantsolíu hefur heimsmarkaðsverðið hækkað úr 684 dollurum fyrir tonnið upp í 722 dollara á einni viku. Til mótvægis hafi gengi krónunnar styrkst og því þurfti bensínhækkunin ekki að vera meiri miðað við óbreytta álagningu.

Albert Þór Magnússon, framkvæmdastjóri hjá Atlantsolíu, gagnrýnir stóru olíufélögin fyrir með hvaða hætti bensínverð hækkaði hjá þeim fyrir helgi.

Hann segir mjög einkennilegt að þau hafi öll hækkað verðið á eldsneyti um sömu krónutölu, á nákvæmlega sama tíma.

Samkvæmt athugun fréttastofunnar hefur bensínið hækkað um tvær krónur íslenskar í Danmörku síðustu dagana og um tæpar tvær krónur í Svíþjóð.