Hrein eign lífeyrissjóðanna 1500 milljarðar króna

Hrein eign lífeyrissjóða landsins nam tæplega 1500 milljörðum króna í árslok 2006 og jókst um nærri fjórðung á árinu. Þetta kemur fram í skýrslu Fjármálaeftirlitsins um ársreikninga lífeyrissjóða fyrir síðasta ár.

Hrein raunávöxtun lífeyrissjóðanna miðað við neysluverðsvísitölu var um 10 prósent á árinu og lækkaði um 3 prósentu stig frá fyrra ári. Þá fækkaði lífeyrissjóðum um 5 á árinu en þeir voru 41 í árslok 2006, þar af 32 fullstarfandi. Iðgjöld lífeyrissjóða hækkuðu á milli ára úr 87 milljörðum króna á árinu 2005 í 96 milljarða króna á árinu 2006.

Skýrsla Fjármálaeftirlitsins leiðir enn fremur í ljós að séreignasparnaður hjá lífeyrissjóðunum jókst um 50 milljarða eða þriðjung milli ára og nam um 198 milljörðum króna í lok árs 2006. Er séreignarsparnaður því orðinn 13 prósent af heildareignum lífeyriskerfisins.