Forstjóri Orkuveitunnar í sjö mánaða leyfi

Guðmundur Þóroddsson, forstjóri Orkuveitu Reykjavíkur, mun taka sér leyfi frá störfum næstu sjö mánuði. Á meðan á leyfinu stendur mun Guðmundur starfa sem forstjóri Reykjavík Energy Invest. Samkvæmt heimildum Vísis hefur verið  boðað til fundar starfsfólks á morgun, þriðjudag. Haukur Leósson, stjórnarformaður Orkuveitunnar, sagði í samtali við Vísi að Guðmundur hefði verið fenginn til verksins vegna yfirburða þekkingar hans á orkumálum.

"Ég hef verið að vinna að því undanfarið að fá Guðmund til að taka þetta verkefni að sér vegna yfirburða þekkingar hans á orkugeiranum. Ég treysti engum manni betur til að stýra Reykjavík Energy Invest á næstu mánuðum. Þeir skipta miklu máli því framundan eru verkefni í samstarfi við Enex í Kína og Kaliforníu. Það eru miklir peningar í spilinu því Orkuveitan hefur lagt til tvo milljarða í hlutafé. Guðmundur er rétti maðurinn til að sjá til þess að þessum peningum verði sem best varið," segir Haukur Leósson, stjórnarformaður Orkuveitunnar, í samtali við Vísi.

Hjörleifur Kvaran, aðstoðarforstjóri Orkuveitunnar, mun gegna starfi forstjóra á meðan leyfi Guðmundar stendur yfir en Haukur ítrekar að öruggt sé að Guðmundur snúi til baka í forstjórastólinn. "Hans er þörf í þessu verkefni nú en auðvitað viljum við hafa hann sem forstjóra Orkuveitunnar til frambúðar," segir Haukur. 

„Reykjavik Energy Invest er dótturfyrirtæki Orkuveitu Reykjavíkur. Fyrirtækið var sett á fót í vor og er markmið félagsins að vera vaxtarbroddur íslenskrar orkuþekkingar á erlendri grund. Allar eigur Orkuveitunnar í verkefnum erlendis hafa verið færðar til hins nýja félags auk nýs hlutafjár. Fjöldi innlendra og erlendra fjárfesta hefur lýst áhuga á að koma að Reykjavik Energy Invest og verður það hlutverk Guðmundar að móta fyrirtækið og leiða útrás," að því er fram kemur í tilkynningu sem send var til starfsfólks Orkuveitunnar í dag.