Bjartur leitar að nýjum Dan Brown

Bókaútgáfan Bjartur stendur fyrir óvenjulegri bókmenntasamkeppni þessa dagana. Tilefnið er ritteppa Dans Browns, höfundar Da Vinci lykilsins, söluhæstu bókar allra tíma. Bókin kom út árið 2003 og síðan þá - undanfarin fjögur ár - hefur Brown reynt að klára næstu skáldsögu sína, sem hefur vinnuheitið Salomons lykilinn.

Í tilkynningu frá Bjarti segir að til að létta milljónum manna biðina eftir nýrri bók hafi útgáfan ákveðið að hleypa af stokkunum verkefni sem ber yfirskriftina "Leitin að nýjum Dan Brown."

Leitað er að handriti að glæpasögu sem á möguleika á alþjóðlegum vinsældum. Milljón verður veitt í verðlaun, berist slíkt handrit í keppnina, auk hefðbundinna höfundarlauna. Bjartur áskilur sér þó rétt til að hafna öllum handritum beri svo undir.

Réttindastofa Bjarts annast sölumál á verðlaunahandritinu á erlendum vettvangi og verður lagt í umfangsmikla alþjóðlega kynningarherferð á handritinu með það að markmiði að gera það að alþjóðlegri metsölubók.

Nú þegar hefur þýski útgáfurisinn Bastei Lübbe, sem einnig er forlag Dan Brown þar í landi, fest kaup á útgáfuréttinum að handritinu fyrir 10.000 evrur. Aldrei áður hefur verið samið fyrirfram um erlendan útgáfurétt á sigurhandriti í íslenskri bókmenntasamkeppni. Þýskaland er öflugasti markaður heims fyrir þýðingar - og þar sló Dan Brown fyrst í gegn utan heimalandsins.

Skilafrestur handrita er til 1. júlí 2008 og verður vinningshafinn tilkynntur sama dag og bókin kemur út, 1. október sama ár. Handritin merkt dulnefni skulu berast Bjarti, Bræðraborgarstíg 9, 101 Reykjavík. Rétt nafn höfundar skal fylgja með í lokuðu umslagi.