Öryggismat sagt gert eftir forskrift forseta

Eigendur tveggja húsa í næsta nágrenni við gestahús forseta Íslands á Laufásvegi 72 hafa nú kært borgaryfirvöld vegna synjunar leyfis til að gera breytingar við hús þeirra.

Skipulagsráð Reykjavíkur neitaði báðum húseigendunum um heimild til breytinganna á grundvelli öryggismats sem forsetaembættið fékk hjá ríkislögreglustjóra, sem taldi breytingarnar torvelda öryggisgæslu við gestahúsið.

Í kæru lögmanns Þorsteins M. Jónssonar, stjórnarformanns Vífilfells, sem býr á Laufásvegi 73, segir meðal annars að synjun byggingarleyfis til handa Þorsteini sé brot á meðalhófsreglu og jafnræðisreglu stjórnsýslulaga.

Úrskurðarnefnd skipulags- og bygg­ingarmála hefur gefið Reykja­víkurborg frest til 6. september til að skýra sjónarmið sín. Það sama gildir um kæru Einars Eiríkssonar, sem býr á Laufávegi 74 og fær ekki að reisa sólstofu vegna nábýlisins við gestahúsið.

Þorsteinn hefur nú um árabil reynt að fá leyfi fyrir ýmsum breytingum. Meðal annars vill hann byggja nýtt tvöfalt bílskýli og jarðhýsi og reisa skjólveggi. Forsetaembættið hefur ávallt lagst gegn því að leyfið verði veitt, bæði vegna áðurnefndra öryggissjónarmiða og vegna þess að breytingar myndu raska virðingu og ró götunnar.

Hvorki skipulagsráð né umræddir nágrannar gestabústaðarins fá aðgang að öryggismati ríkislögreglustjórans. Þá segir lögmaður Þorsteins, Einar Þór Sverrisson, að ríkislögreglustjóri hafi snúist í skoðun sinni á málinu eftir samtöl við fulltrúa forsetaembættins.

„Það hvarflar að kæranda (Þor­steini M. Jónssyni) að sjónarmið um öryggi hugsanlegra gesta hússins hafi einfaldlega verið búin til af ríkislögreglustjóra samkvæmt for­skrift forseta Íslands,“ segir Einar.

Þeir Þorsteinn draga báðir í efa að gesta­húsið sé í raun notað fyrir tigna gesti eins og sagt er. „Sé minnsti fótur fyrir þessum öryggis­kröfum er starf­semin á röngum stað og ber að víkja en ekki eðlilegir hagsmunir hverfisins,“ segir Einar Eiríksson.

Embætti ríkislögreglustjóra hefur áður neitað að svara spurn­ingum Fréttablaðsins varðandi gesta­húsið á Laufásvegi.