Köstuðu snjóboltum í bifreiðar á ferð

Lögreglan á Hvolsvelli hafði í vikunni hendur í hári ungmenna sem höfðu gert það að leik sínum að kasta snjóboltum í bifreiðar sem ekið var yfir Ytri-Rangá. Hætt var við að ökumenn misstu stjórn á bifreiðum sínum vegna athæfis ungmennanna að sögn lögreglu.

Alls hafa 34 ökumenn verið teknir fyrir hraðakstur í umdæmi lögreglunnar á Hvolsvelli á síðustu tveimur vikum. Þá hefur fimm sinnum verið tilkynnt um lausa hesta við þjóðvegi. Fjórtán ökumenn voru stöðvaðir þar sem ljósabúnaður var ekki í lagi.

Þá lentu átta ökumenn í vandræðum vegna holna á Austurvegi þar sem ekið er í gegnum Hvolsvöll. Skemmdust dekk á bílum og í nokkrum tilvikum bæði fram- og afturdekk.